ബജറ്റ് കുറച്ച് ടിവി യൂണിറ്റിന് ലക്ഷ്വറി ലുക്ക് നൽകാം; ഈ കാര്യങ്ങൾ ശ്രദ്ധിച്ചാൽ ഭംഗിയും കൂടും, ചെലവും കുറയും

വീടിന്റെ ലിവിങ് റൂമിലേക്ക് കടന്നുവരുമ്പോൾ ആദ്യം ശ്രദ്ധയിൽപ്പെടുന്ന ഭാഗങ്ങളിൽ ഒന്നാണ് ടിവി യൂണിറ്റ്. അതുകൊണ്ടുതന്നെ വീടിന്റെ മൊത്തത്തിലുള്ള ഇന്റീരിയർ ഭംഗിയിലും ടിവി യൂണിറ്റിന് വലിയ പങ്കുണ്ട്. എന്നാൽ ഒരു പ്രീമിയം ലുക്ക് നൽകണമെങ്കിൽ വിലകൂടിയ മെറ്റീരിയലുകളും കസ്റ്റമൈസ്ഡ് ഫർണിച്ചറുകളും നിർബന്ധമാണെന്ന ധാരണ പലർക്കുമുണ്ട്. യഥാർഥത്തിൽ, ശരിയായ ഡിസൈൻ തിരഞ്ഞെടുപ്പുകളും മെറ്റീരിയലുകളുടെ കൃത്യമായ കോമ്പിനേഷനും ഉപയോഗിച്ചാൽ വലിയ തുക ചെലവഴിക്കാതെ തന്നെ ടിവി യൂണിറ്റിന് ലക്ഷറി ലുക്ക് നൽകാം.

പ്രീമിയം ലുക്ക് ലഭിക്കാൻ ആദ്യം ശ്രദ്ധിക്കേണ്ടത് ഡിസൈന്റെ ലാളിത്യമാണ്. ഒരുപാട് ഷെൽഫുകളും വ്യത്യസ്ത നിറങ്ങളും ഡിസൈൻ എലമെന്റുകളും നിറച്ച ടിവി യൂണിറ്റിനേക്കാൾ ക്ലീൻ ലൈനുകളും കുറച്ച് വിശദാംശങ്ങളുമുള്ള ഡിസൈനുകളാണ് കൂടുതൽ എലഗന്റായി തോന്നുന്നത്. ടിവി വാൾ തന്നെ പ്രധാന ഫീച്ചറായി മാറ്റി, അതിന് അനുയോജ്യമായ രീതിയിൽ ചെറിയൊരു കൺസോൾ യൂണിറ്റും കുറച്ച് സ്റ്റോറേജ് സ്പേസും നൽകിയാൽ മിനിമൽ ബജറ്റിൽ തന്നെ മനോഹരമായൊരു ടിവി പോയിന്റ് സൃഷ്ടിക്കാം.

മെറ്റീരിയൽ തിരഞ്ഞെടുപ്പിലും ബുദ്ധിപൂർവമായ സമീപനം വേണം. മുഴുവൻ ഭാഗവും വിലകൂടിയ വുഡ് പാനലുകൾ കൊണ്ട് ചെയ്യുന്നതിനുപകരം, ആവശ്യമായ ഭാഗങ്ങളിൽ മാത്രം വുഡ് ഫിനിഷ് ഉപയോഗിക്കുന്നത് ചെലവ് കുറയ്ക്കാൻ സഹായിക്കും. വുഡ് ഫിനിഷിനൊപ്പം പ്ലെയിൻ ലാമിനേറ്റ്, മാറ്റ് ഫിനിഷ് പാനലുകൾ എന്നിവ ചേർത്താൽ ഡിസൈനിന് കൂടുതൽ ഡെപ്തും കോൺട്രാസ്റ്റും ലഭിക്കും. പ്രത്യേകിച്ച് വുഡ് ടോൺ, ഓഫ്-വൈറ്റ്, ബീജ്, ഗ്രേ തുടങ്ങിയ ന്യൂട്രൽ ഷേഡുകളുടെ കോമ്പിനേഷൻ വീടിന് ശാന്തവും വിലകൂടിയതുമായ ഒരു ലുക്ക് നൽകും.

ടിവിയുടെ പിന്നിലെ വാൾ തന്നെയാണ് യൂണിറ്റിന്റെ ഭംഗി നിർണയിക്കുന്ന മറ്റൊരു പ്രധാന ഘടകം. മുഴുവൻ ഭിത്തിയിലും ചെലവേറിയ സ്റ്റോൺ ക്ലാഡിങ് ചെയ്യുന്നതിനുപകരം, ടിവി വരുന്ന ഭാഗത്ത് മാത്രം ടെക്സ്ചർഡ് ഫിനിഷ് നൽകാം. വുഡ് ഫിനിഷ് പാനലിനൊപ്പം സ്റ്റോൺ-ലുക്ക് ലാമിനേറ്റ് ഉപയോഗിക്കുന്നതും ചെലവ് നിയന്ത്രിച്ചുകൊണ്ട് പ്രീമിയം എഫക്റ്റ് നൽകുന്ന മാർഗമാണ്. യഥാർഥ കല്ലിന്റെ വിലയിലേക്ക് പോകാതെ അതിനോട് സാമ്യമുള്ള ഫിനിഷുകൾ തിരഞ്ഞെടുക്കുന്നത് ബജറ്റ് ഫ്രണ്ട്ലി ഇന്റീരിയറുകളിൽ പ്രത്യേകിച്ച് പ്രായോഗികമാണ്.

ലൈറ്റിങ്ങാണ് സാധാരണ ടിവി യൂണിറ്റിനെ പോലും കൂടുതൽ ആഡംബരമുള്ളതായി തോന്നിക്കാൻ കഴിയുന്ന മറ്റൊരു ഘടകം. ടിവി യൂണിറ്റിന്റെ പിന്നിൽ നേരിട്ട് കാണുന്ന രീതിയിൽ ശക്തമായ ലൈറ്റുകൾ നൽകുന്നതിന് പകരം, വാം വൈറ്റ് LED സ്ട്രിപ്പ് ലൈറ്റുകൾ മറച്ചുവെച്ച് ഉപയോഗിക്കുന്നത് കൂടുതൽ മനോഹരമായ അന്തരീക്ഷം സൃഷ്ടിക്കും. ഷെൽഫുകളുടെ അടിയിലോ വുഡ് പാനലിന്റെ പിന്നിലോ നൽകുന്ന  ലൈറ്റിങ് ഡിസൈനിന് ഡെപ്ത് നൽകുകയും വൈകുന്നേരങ്ങളിൽ ടിവി വാൾ കൂടുതൽ ആകർഷകമാക്കുകയും ചെയ്യും.

സ്റ്റോറേജിന്റെ കാര്യത്തിലും ‘കൂടുതൽ’ എന്നതിനേക്കാൾ ‘ആവശ്യത്തിന്’ എന്നതാണ് നല്ല ഡിസൈൻ. ടിവി ബോക്സ്, റിമോട്ടുകൾ, ചെറിയ ഇലക്ട്രോണിക് ഉപകരണങ്ങൾ തുടങ്ങിയവ വയ്ക്കാൻ അടച്ച കാബിനറ്റുകൾ നൽകാം. അതേസമയം മുഴുവൻ യൂണിറ്റും അടച്ചുവയ്ക്കാതെ ഒന്നോ രണ്ടോ ഓപ്പൺ ഷെൽഫുകൾ മാത്രം നൽകുന്നത് ഡിസൈൻ ഭാരം കുറയ്ക്കും. അവിടെ കുറച്ച് പുസ്തകങ്ങളോ ചെറിയ അലങ്കാര വസ്തുക്കളോ ചെടികളോ മാത്രം വയ്ക്കാം. വസ്തുക്കൾ അധികമാകുമ്പോൾ പ്രീമിയം ലുക്ക് നഷ്ടപ്പെടുന്നതിനാൽ അലങ്കാരത്തിലും മിനിമലിസം പാലിക്കുന്നത് പ്രധാനമാണ്.

ടിവി യൂണിറ്റിന്റെ വലുപ്പവും ശ്രദ്ധിക്കേണ്ട കാര്യമാണ്. മുറിയുടെ വലുപ്പത്തിന് ആനുപാതികമല്ലാത്ത രീതിയിൽ വലിയൊരു യൂണിറ്റ് സ്ഥാപിക്കുന്നത് ബജറ്റ് വർധിപ്പിക്കുന്നതിനൊപ്പം മുറി കൂടുതൽ നിറഞ്ഞതായി തോന്നാനും ഇടയാക്കും. ടിവിയുടെ വലുപ്പം, ഭിത്തിയുടെ വീതി, സോഫയുടെ സ്ഥാനം എന്നിവ കണക്കിലെടുത്ത് ശരിയായ പ്രൊപോർഷൻൽ യൂണിറ്റ് ഡിസൈൻ ചെയ്യുന്നതാണ് കൂടുതൽ മനോഹരം. ചെറിയ ലിവിങ് റൂമുകളിൽ ഫ്ലോട്ടിങ് കൺസോൾ പോലുള്ള ഡിസൈനുകൾ ഉപയോഗിച്ചാൽ താഴത്തെ നിലയിലെ ഫ്ലോർ സ്പേസ് തുറന്നുകാണിക്കുകയും മുറിക്ക് കൂടുതൽ വിശാലമായ തോന്നൽ ലഭിക്കുകയും ചെയ്യും.

ഹാൻഡിൽ കാണാത്ത കാബിനറ്റ് ഡോറുകൾ, ഫ്ലഷ് ഫിനിഷ്, കൃത്യമായ ജോയിന്റുകൾ എന്നിവ പോലുള്ള ചെറിയ വിശദാംശങ്ങൾക്കും വലിയ മാറ്റം സൃഷ്ടിക്കാനാകും. വിലകൂടിയ മെറ്റീരിയൽ ഉപയോഗിക്കുന്നതിനെക്കാൾ, വർക്ക്‌മാൻഷിപ്പിന്റെ ഫിനിഷിംഗിനും ഡിസൈന്റെ പ്രൊപോർഷൻനും പ്രാധാന്യം നൽകുന്നത് പലപ്പോഴും കൂടുതൽ മികച്ച ഫലം നൽകും. ഒരു സാധാരണ ലാമിനേറ്റ് പോലും വൃത്തിയായി ഫിനിഷ് ചെയ്താൽ പ്രീമിയമായി തോന്നും.

മറ്റൊരു പ്രധാന കാര്യം ടിവി യൂണിറ്റിന് ചുറ്റുമുള്ള ഭാഗം ക്ലട്ടർ ഫ്രീ ആയി സൂക്ഷിക്കുക എന്നതാണ്. വയറുകൾ പുറത്തുകാണുന്നത്, ഒരുപാട് ഇലക്ട്രോണിക് ഉപകരണങ്ങൾ തുറന്നുവയ്ക്കുന്നത്, ഷെൽഫുകളിൽ അനാവശ്യ അലങ്കാര വസ്തുക്കൾ നിറയ്ക്കുന്നത് എന്നിവ യൂണിറ്റിന്റെ ഭംഗി കുറയ്ക്കും. അതിനാൽ ഡിസൈൻ ചെയ്യുമ്പോൾ തന്നെ വയറുകൾ മറയ്ക്കാനുള്ള സൗകര്യവും സെറ്റ്-ടോപ്പ് ബോക്സ്, റൂട്ടർ തുടങ്ങിയ ഉപകരണങ്ങൾ വയ്ക്കാനുള്ള സ്ഥലം ഉൾപ്പെടുത്തുന്നതും നല്ലതാണ്.

ചുരുക്കത്തിൽ, ടിവി യൂണിറ്റിന് ലക്ഷറി ലുക്ക് നൽകുന്നത് വിലകൂടിയ മെറ്റീരിയൽ ഉപയോഗിക്കുന്നതിലല്ല, മറിച്ച് ശരിയായ ഡിസൈൻ, പരിമിതമായ നിറങ്ങൾ, നല്ല ലൈറ്റിങ്, വൃത്തിയുള്ള ഫിനിഷ്, കൃത്യമായ പ്രൊപോർഷൻ എന്നിവയുടെ കൂട്ടായ്മയിലാണ്. മുഴുവൻ ഭിത്തിയും ചെലവേറിയ രീതിയിൽ അലങ്കരിക്കുന്നതിനുപകരം ശ്രദ്ധിക്കേണ്ട ഭാഗങ്ങളിൽ മാത്രം ചെയ്യുകയും ബാക്കിയുള്ളവ ലളിതമായി നിലനിർത്തുകയും ചെയ്താൽ ബജറ്റ് നിയന്ത്രിച്ചുകൊണ്ട് തന്നെ ഒരു ഹൈഎൻഡ് ഇന്റീരിയറിന്റെ ഭംഗി സ്വന്തമാക്കാം.