വീട്ടിലെ ചുമരിൽ വിള്ളലുണ്ടോ? ചിലത് നിസ്സാരമല്ല; പെയിന്റടിച്ച് മറയ്ക്കുന്നതിന് മുമ്പ് ഈ കാര്യങ്ങൾ പരിശോധിക്കണം!

വീട്ടിൽ ഒരു ദിവസം അപ്രതീക്ഷിതമായി ചുമരിൽ ഒരു ചെറിയ വിള്ളൽ ശ്രദ്ധയിൽപ്പെടുന്നു. ആദ്യം ഒരു നേർത്ത വരപോലെ മാത്രം. പക്ഷേ ദിവസങ്ങൾ കഴിയുമ്പോൾ അത് കുറച്ചുകൂടി നീണ്ടതായി തോന്നുന്നു. അതോടെ വീട്ടുകാരുടെ മനസ്സിലും സംശയം തുടങ്ങും. വീടിന് എന്തെങ്കിലും കുഴപ്പമുണ്ടോ? പലപ്പോഴും ചെറിയൊരു വിള്ളൽ കണ്ടാൽ പോലും വീടിന്റെ ഉറപ്പിനെക്കുറിച്ച് ആശങ്കപ്പെടുന്നത് സ്വാഭാവികമാണ്. പ്രത്യേകിച്ച് വർഷങ്ങളായി താമസിക്കുന്ന വീട്ടിലാണെങ്കിൽ ഭയം കുറച്ചുകൂടി കൂടും. 

എന്നാൽ ചുമരിൽ കാണുന്ന ഓരോ വിള്ളലും വീടിന്റെ ഘടനയ്ക്ക് അപകടം സംഭവിച്ചതിന്റെ സൂചനയല്. ചില വിള്ളലുകൾ സാധാരണയായി പ്ലാസ്റ്ററിലോ പെയിന്റിലോ ഉണ്ടാകുന്ന മാറ്റങ്ങൾ മൂലമാകാം. അതേസമയം, ചില വിള്ളലുകൾ അവഗണിക്കാനും പാടില്ല.

 ആദ്യം നോക്കേണ്ടത് വിള്ളൽ എവിടെയാണ് എന്നതാണ്

വിള്ളലിന്റെ വലുപ്പം മാത്രം നോക്കി അതിന്റെ ഗൗരവം തീരുമാനിക്കാൻ കഴിയില്ല. അത് ചുമരിന്റെ ഏത് ഭാഗത്താണ്, എങ്ങനെയാണ് രൂപപ്പെട്ടിരിക്കുന്നത്, കാലം കഴിയുമ്പോൾ വലുതാകുന്നുണ്ടോ തുടങ്ങിയ കാര്യങ്ങൾ കൂടി നോക്കണം.

പ്ലാസ്റ്ററിന്റെ ഉപരിതലത്തിൽ മാത്രം കാണുന്ന വളരെ നേർത്ത വിള്ളലുകൾ പല വീടുകളിലും കാണാറുണ്ട്. പ്ലാസ്റ്റർ ഉണങ്ങുമ്പോൾ ഉണ്ടാകുന്ന ചെറിയ ചുരുങ്ങൽ, ചൂടിലും തണുപ്പിലുമുള്ള മാറ്റങ്ങൾ, ഈർപ്പം തുടങ്ങിയ പല കാരണങ്ങളും ഇത്തരം വിള്ളലുകൾക്ക് പിന്നിലുണ്ടാകാം.

അതുകൊണ്ട് ഒരു ചെറിയ വിളൽ കണ്ട ഉടൻ തന്നെ വീട് അപകടത്തിലാണ് എന്ന് കരുതേണ്ടതില്ല.

പക്ഷേ അതേ വിള്ളൽ ക്രമേണ വീതി കൂടുകയോ നീളം വർധിക്കുകയോ ചെയ്യുന്നുണ്ടെങ്കിൽ കാര്യമായി പരിശോധിക്കേണ്ടി വരും.

 ജനലിന്റെയും വാതിലിന്റെയും കോണുകൾ ശ്രദ്ധിക്കാം

വീട്ടിലെ ജനലുകളുടെയും വാതിലുകളുടെയും കോണുകളിൽ ചിലപ്പോൾ വിള്ളലുകൾ കാണാം. പ്രത്യേകിച്ച് ഒരു കോണിൽ നിന്ന് ചരിഞ്ഞ രീതിയിൽ ചുമരിലേക്ക് നീളുന്ന വിള്ളലുകൾ ശ്രദ്ധയിൽപ്പെട്ടാൽ അത് അവഗണിക്കാതെ നിരീക്ഷിക്കുന്നത് നല്ലതാണ്.

എല്ലാ  ക്രാക്ക്കളും ഘടനാപരമായ പ്രശ്നം തന്നെയാണെന്ന് പറയാനാവില്ല. എന്നാൽ വിള്ളൽ വലുതാകുന്നുണ്ടോ, ചുമരിന്റെ മറുവശത്തും ഇതേ പ്രശ്നമുണ്ടോ, വാതിലും ജനലും അടയ്ക്കുന്നതിൽ മാറ്റമുണ്ടായോ തുടങ്ങിയ കാര്യങ്ങൾ കൂടി ശ്രദ്ധിക്കണം.

ബീമിൽ വിള്ളൽ കണ്ടാൽ

ഇവിടെയാണ് കുറച്ചുകൂടി ശ്രദ്ധ വേണ്ടത്. ചുമരിലെ പ്ലാസ്റ്ററിൽ മാത്രം കാണുന്ന ചെറിയൊരു വിള്ളലും വീടിന്റെ ബീം പോലുള്ള ഘടനാപരമായ ഭാഗങ്ങളിൽ കാണുന്ന വിള്ളലും ഒരുപോലെ കാണരുത്.

ബീമിൽ വ്യക്തമായ വിള്ളൽ കാണുന്നുണ്ടെങ്കിൽ, പ്രത്യേകിച്ച് അത് പുതുതായി ഉണ്ടായതോ വലുതാകുന്നതോ ആണെങ്കിൽ, വിദഗ്ധ പരിശോധന നടത്തുന്നതാണ് ഉചിതം.

ഇത്തരം സാഹചര്യങ്ങളിൽ വെറുതെ പുട്ടിയിട്ട് പെയിന്റ് ചെയ്ത് വിള്ളൽ മറയ്ക്കുന്നത് പരിഹാരമാകണമെന്നില്ല. ആദ്യം വിള്ളലിന്റെ കാരണം കണ്ടെത്തുകയാണ് പ്രധാനം.

 വിള്ളലിനൊപ്പം ഈർപ്പവും ഉണ്ടോ?

ചിലപ്പോൾ ചുമരിലെ വിള്ളലിനൊപ്പം തന്നെ വെള്ളക്കറയും ഈർപ്പവും കാണാം. പെയിന്റ് പൊളിയുക, ചുമരിൽ കറുത്ത പാടുകൾ വരിക, പൂപ്പൽ രൂപപ്പെടുക തുടങ്ങിയവയും ഇതോടൊപ്പം ഉണ്ടാകാം.

ഇത്തരം സാഹചര്യത്തിൽ വിള്ളലിനെ മാത്രം കുറ്റപ്പെടുത്തുന്നതിന് മുമ്പ്  വെള്ളം എവിടെ നിന്നാണ് വരുന്നത് എന്ന് കണ്ടെത്തണം.

മേൽക്കൂരയിലെ ചോർച്ച, പുറംചുമരിലൂടെ മഴവെള്ളം കയറുന്നത്, പൈപ്പിലെ ചോർച്ച തുടങ്ങിയവയും ചുമരിന്റെ അവസ്ഥ മോശമാക്കാം.

അതുകൊണ്ട്  വിള്ളൽ വന്നതുകൊണ്ടാണ് ചുമർ നനയുന്നത് എന്നതുപോലെ ഒരു കാരണ-ഫലം ബന്ധം ഉടൻ തീരുമാനിക്കാതെ പ്രശ്നം മുഴുവനായി പരിശോധിക്കുകയാണ് നല്ലത്.

 വിള്ളൽ വലുതാകുന്നുണ്ടോ എന്ന് നോക്കാം

ഒരു വിള്ളൽ കണ്ടാൽ ഉടൻ തന്നെ പരിഹരിക്കാൻ ഓടുന്നതിന് മുമ്പ് അതിന്റെ സ്ഥിതി മനസ്സിലാക്കുന്നത് സഹായിക്കും.

ആദ്യമായി വിള്ളലിന്റെ ഒരു വ്യക്തമായ ഫോട്ടോ എടുത്തുവയ്ക്കാം. കുറച്ച് ദിവസങ്ങൾക്കോ ആഴ്ചകൾക്കോ ശേഷം അതേ ഭാഗത്തിന്റെ മറ്റൊരു ഫോട്ടോ എടുത്ത് താരതമ്യം ചെയ്യാം.

വിള്ളലിന്റെ നീളത്തിലോ വീതിയിലോ വ്യക്തമായ മാറ്റമുണ്ടോ എന്ന് ശ്രദ്ധിക്കാം.

വീണ്ടും പറയട്ടെ, ഇത് ഒരു വിദഗ്ധ പരിശോധനയ്ക്ക് പകരമല്ല. പക്ഷേ വീട്ടിൽ ഉണ്ടാകുന്ന മാറ്റങ്ങൾ ശ്രദ്ധയിൽപ്പെടാൻ ഇത് സഹായിക്കും.

 വീടിന്റെ പ്രായവും പ്രധാനമാണ്

പുതിയതായി നിർമ്മിച്ച വീട്ടിലും പഴയ വീട്ടിലും ഉണ്ടാകുന്ന വിള്ളലുകളെ ഒരേ രീതിയിൽ കാണാൻ കഴിയില്ല.

പുതിയ കെട്ടിടങ്ങളിൽ നിർമ്മാണത്തിന് ശേഷം ചില ഘടകങ്ങൾ ഉണങ്ങുകയും ചെറിയ തോതിൽ ചുരുങ്ങുകയും ചെയ്യുമ്പോൾ ചില നേർത്ത വിള്ളലുകൾ ഉണ്ടാകാം.

അതേസമയം പഴയ വീട്ടിൽ വർഷങ്ങൾക്ക് ശേഷം പെട്ടെന്ന് പുതിയൊരു വിള്ളൽ പ്രത്യക്ഷപ്പെടുകയോ നിലവിലുള്ള വിള്ളൽ വലുതാകുകയോ ചെയ്താൽ അതിന് കൂടുതൽ ശ്രദ്ധ നൽകേണ്ടി വരാം.

 വീട് വാങ്ങാൻ പോകുന്നവർക്ക് ഒരു ചെറിയ മുന്നറിയിപ്പ്

പുതിയ വീട് വാങ്ങാൻ പോകുമ്പോൾ വീടിന്റെ നിറവും ഇന്റീരിയറും മാത്രം കണ്ട് തീരുമാനിക്കുന്നത് എളുപ്പമാണ്.

പക്ഷേ ഒരു വീടിനെ അടുത്തുനിന്ന് നോക്കുമ്പോൾ ചുമരുകളിലും മേൽക്കൂരയിലും ജനൽ-വാതിൽ ഭാഗങ്ങളിലും ഈർപ്പത്തിന്റെ അടയാളങ്ങളുണ്ടോ എന്ന് ശ്രദ്ധിക്കുന്നത് നല്ലതാണ്.

ചെറിയൊരു വിള്ളൽ കണ്ടാൽ മാത്രം വീട് വേണ്ടെന്ന് വയ്ക്കേണ്ടതില്ല. അതുപോലെ പെയിന്റ് ചെയ്താൽ എല്ലാം ശരിയാകും എന്ന് കരുതുകയും വേണ്ട.

സംശയം തോന്നുന്ന തരത്തിലുള്ള വിള്ളലുകളാണെങ്കിൽ വീടിന്റെ അവസ്ഥയെക്കുറിച്ച് പരിചയമുള്ള ഒരു എൻജിനീയറുടെയോ കെട്ടിട വിദഗ്ധന്റെയോ അഭിപ്രായം തേടുന്നത് പിന്നീട് ഉണ്ടാകാവുന്ന വലിയ ചെലവുകളും ആശങ്കകളും ഒഴിവാക്കാൻ സഹായിക്കും.

 എപ്പോൾ കൂടുതൽ ശ്രദ്ധിക്കണം?

താഴെ പറയുന്ന മാറ്റങ്ങൾ ശ്രദ്ധയിൽപ്പെട്ടാൽ വിള്ളലിനെ കുറിച്ച് കൂടുതൽ ഗൗരവമായി അന്വേഷിക്കുന്നത് നല്ലതാണ്:

വിള്ളൽ ദിവസങ്ങൾ കഴിയുന്തോറും വലുതാകുന്നു

വളരെ വ്യക്തമായതോ വീതിയേറിയതോ ആയ വിള്ളൽ കാണുന്നു, ബീം പോലുള്ള ഘടനാപരമായ ഭാഗങ്ങളിൽ വിള്ളൽ കാണുന്നു

വിള്ളലിനൊപ്പം ചുമർ വളയുന്നതോ പുറത്തേക്ക് തള്ളിനിൽക്കുന്നതോ പോലെ തോന്നുന്നു

വാതിലുകളും ജനലുകളും മുമ്പത്തേതുപോലെ എളുപ്പത്തിൽ തുറക്കാനോ അടയ്ക്കാനോ കഴിയുന്നില്ല

വിള്ളലിനൊപ്പം വെള്ളക്കറയോ സ്ഥിരമായ ഈർപ്പമോ കാണുന്നു

ഒരേ ഭാഗത്ത് പലതരത്തിലുള്ള വിള്ളലുകൾ ഒരുമിച്ച് പ്രത്യക്ഷപ്പെടുന്നു 

ഇത്തരം സാഹചര്യങ്ങളിൽ കാരണം മനസ്സിലാക്കാതെ സ്വയം അറ്റകുറ്റപ്പണി ചെയ്യുന്നതിന് പകരം വിദഗ്ധന്റെ സഹായം തേടുന്നതാണ് സുരക്ഷിതം.

 ചെറിയ വിള്ളൽ കണ്ടാൽ ഭയക്കേണ്ട, പക്ഷേ അവഗണിക്കരുത്

വീടിന്റെ ചുമരിലെ ഒരു ചെറിയ വിള്ളൽ കണ്ടാൽ ഉടൻ ഭയപ്പെടേണ്ട കാര്യമില്ല. പലപ്പോഴും അത് വീടിന്റെ ഘടനാപരമായ പ്രശ്നം ആയിരിക്കണമെന്നില്ല.

എന്നാൽ ചെറിയതല്ലേ എന്ന് പറഞ്ഞ് വർഷങ്ങളോളം അതിനെ അവഗണിക്കുന്നതും നല്ല ശീലമല്ല.

ഒരു വീടിന് നമ്മളോട് സംസാരിക്കാൻ കഴിയില്ല. പക്ഷേ ചുമരിലെ വിള്ളൽ, ഈർപ്പത്തിന്റെ പാട്, പെയിന്റ് പൊളിയൽ തുടങ്ങിയ ചെറിയ മറ്റങ്ങളിലൂടെ ചിലപ്പോൾ വീട് അതിന്റെ അവസ്ഥ നമ്മളെ അറിയിക്കുന്നുണ്ടാകാം.

അതിനാൽ അടുത്ത തവണ ചുമരിൽ ഒരു വിള്ളൽ കണ്ടാൽ ആദ്യം ചെയ്യേണ്ടത് പേടിക്കുകയോ പെയിന്റ് വാങ്ങാൻ ഓടുകയോ അല്ല. ഒന്ന് ശ്രദ്ധിച്ച് നോക്കുക.എവിടെയാണ് വിള്ളൽ,എങ്ങനെയാണ് വന്നത്,വലുതാകുന്നുണ്ടോ,

അതോടൊപ്പം മറ്റെന്തെങ്കിലും മാറ്റമുണ്ടോ,ഉത്തരം കിട്ടാത്ത സംശയമാണെങ്കിൽ, ഒരു വിദഗ്ധന്റെ അഭിപ്രായം തേടുക.കാരണം വീടിന്റെ കാര്യത്തിൽ ചെറിയൊരു പ്രശ്നം നേരത്തെ തിരിച്ചറിയുന്നത്, വലിയൊരു പ്രശ്നം പിന്നീട് പരിഹരിക്കുന്നതിനേക്കാൾ എപ്പഴും എളുപ്പമാണ്.