തോന്നിയ ഉയരത്തിൽ മതിൽ കെട്ടാൻ സാധിക്കുമോ? നിസ്സാരമല്ല, ഈ നിയമങ്ങൾ അറിഞ്ഞിരിക്കണം

വീട് നിർമ്മാണത്തിനൊപ്പം തന്നെ പ്രാധാന്യമുള്ള ഒന്നാണ് ചുറ്റുമതിൽ നിർമ്മാണം. എന്നാൽ മതിലുകൾ പണിയുന്നതിൽ കൃത്യമായ കെട്ടിട നിർമ്മാണ ചട്ടങ്ങൾ നിലവിലുണ്ടെന്ന കാര്യം പലപ്പോഴും ആരും അറിയാറില്ല. കേരള പഞ്ചായത്ത്-മുനിസിപ്പൽ കെട്ടിട നിർമ്മാണ നിയമങ്ങൾ അനുസരിച്ച് ഓരോ മതിലും ഒരു പ്രത്യേക നിർമ്മിതിയായാണ്  കണക്കാക്കുന്നത്. അതിനാൽ കൃത്യമായ പെർമിറ്റില്ലാതെ മതിൽ നിർമ്മിക്കുന്നത് നിയമനടപടികൾക്ക് കാരണമായേക്കാം.

കെ-സ്മാർട്ട് വഴി അപേക്ഷിക്കാം

മതിൽ നിർമ്മാണം ആരംഭിക്കുന്നതിന് മുൻപായി ബന്ധപ്പെട്ട തദ്ദേശ സ്വയംഭരണ സ്ഥാപനത്തിൽ നിന്ന് അനുമതി വാങ്ങേണ്ടത് നിർബന്ധമാണ്. സ്ഥലത്തിന്റെ ഉടമസ്ഥാവകാശ രേഖകൾക്കൊപ്പം അംഗീകൃത ലൈസൻസുള്ള എൻജിനീയർ തയ്യാറാക്കിയ സൈറ്റ് പ്ലാൻ കൂടി സമർപ്പിക്കണം. നിലവിൽ 'കെ-സ്മാർട്ട്' ഓൺലൈൻ പ്ലാറ്റ്‌ഫോം വഴി അപേക്ഷകൾ സമർപ്പിക്കാൻ സാധിക്കും. വീടിന്റെ പെർമിറ്റ് എടുക്കുന്ന സമയത്ത് തന്നെ മതിലിനുള്ള അപേക്ഷയും നൽകുന്നത് പണവും സമയവും ലാഭിക്കാൻ സഹായിക്കും.

റോഡിൽ നിന്നുള്ള അകലം 

മതിൽ കെട്ടുമ്പോൾ റോഡിൽ നിന്നും എത്ര ദൂരം മാറണം എന്ന കാര്യത്തിൽ വലിയ ആശങ്കകൾ നിലനിൽക്കുന്നുണ്ട്. എന്നാൽ നിലവിലെ നിയമപ്രകാരം സ്വന്തം വസ്തുവിന്റെ അതിർത്തിയിൽ തന്നെ മതിൽ നിർമ്മിക്കാൻ സാധിക്കും. റോഡിൽ നിന്ന് പ്രത്യേക 'സെറ്റ് ബാക്ക്' ദൂരം മതിലിന് ആവശ്യമില്ല. എന്നാൽ മതിലിന്റെ ഒരു ഭാഗവും റോഡിലേക്ക് തള്ളിനിൽക്കാൻ പാടില്ല എന്നത് കർശനമാണ്.

ഉയരപരിധി ശ്രദ്ധിക്കണം 

മതിലിന്റെ ഉയരത്തിന് നിയമത്തിൽ പ്രത്യേക പരിധി പറയുന്നില്ലെങ്കിലും സുരക്ഷാ മാനദണ്ഡങ്ങൾ പാലിക്കേണ്ടതുണ്ട്. അമിതമായ ഉയരമുള്ള മതിലുകൾ കാറ്റിലോ മറ്റ് പ്രകൃതിക്ഷോഭങ്ങളിലോ അപകടമുണ്ടാക്കാൻ സാധ്യതയുള്ളതിനാൽ, എൻജിനീയറിങ് വിഭാഗത്തിന്റെ പരിശോധനയ്ക്ക് ശേഷം മാത്രമേ അനുമതി ലഭിക്കൂ. നിയമങ്ങൾ പാലിച്ച് നിർമ്മിക്കുന്ന മതിലുകൾ വീടിന്റെ സുരക്ഷ ഉറപ്പാക്കുന്നതിനൊപ്പം നിയമപരമായ നൂലാമാലകളിൽ നിന്ന് ഉടമയെ സംരക്ഷിക്കുകയും ചെയ്യുന്നു.