പുത്തൻ വീട് വയ്ക്കാൻ ബജറ്റ് കുറവാണോ? നല്ല ലൊക്കേഷനിൽ ഒരു പഴയ വീട് വാങ്ങാൻ മടിക്കേണ്ട; ഈ സിമ്പിൾ ട്രിക്ക് വഴി വീടിനെ പുതിയതാക്കി മാറ്റാം

സ്വന്തമായൊരു വീട് എന്നത് ഏതൊരാളുടെയും ജീവിതത്തിലെ ഏറ്റവും വലിയ സ്വപ്നമാണ്. എന്നാൽ ഉയരുന്ന നിർമ്മാണ സാമഗ്രികളുടെ വിലയും സാമ്പത്തിക പരിമിതികളും പലപ്പോഴും ഈ സ്വപ്നത്തിന് തടസ്സമാകാറുണ്ട്. ഈ സാഹചര്യത്തിൽ പുതിയൊരു വീട് പണിയുന്നതിനേക്കാൾ പ്രായോഗികവും ലാഭകരവുമായ ഒരു പോംവഴിയാണ് പഴയ വീടുകൾ വാങ്ങുക എന്നത്. നമ്മുടെ ഇഷ്ടപ്പെട്ട ലൊക്കേഷനിൽ, ബജറ്റിലൊതുങ്ങുന്ന വിലയിൽ ഒരു വസ്തു കണ്ടെത്തുക എന്നത് ഇന്നത്തെ കാലത്ത് വലിയൊരു വെല്ലുവിളിയാണ്. എന്നാൽ നല്ല ഒരു പ്രദേശത്ത് ആകർഷകമായ വിലയിൽ ഒരു പഴയ വീട് വിൽക്കാനുണ്ടെന്ന് കേൾക്കുമ്പോൾ, അതിന്റെ പഴക്കം കണ്ട് മുഖം തിരിക്കുന്നവരാണ് അധികവും. സത്യത്തിൽ അല്പം ഭാവനയും ശരിയായ പ്ലാനിംഗും ഉണ്ടെങ്കിൽ പുതിയ വീടുകളെ വെല്ലുന്ന ആധുനിക ഭവനമക്കി അതിനെ മാറ്റിയെടുക്കാം എന്നതാണ് യാഥാർത്ഥ്യം.

ഒരു പഴയ വീട് വാങ്ങാൻ പ്ലാൻ ചെയ്യുമ്പോൾ പലരെയും പിന്നോട്ട് വലിക്കുന്നത് അതിന്റ പ്രായം തോന്നിപ്പിക്കുന്ന മങ്ങിയ ഉൾത്തളങ്ങളാണ്. എന്നാൽ ഘടനാപരമായ ബലമുള്ള ഒരു പഴയ വീടിനെ പുത്തൻ ആഡംബര വില്ലയേക്കൾ മനോഹരമാക്കാൻ സാധിക്കുമെന്നതാണ് യാഥാർത്ഥ്യം. വലിയ പണിച്ചിലവുകളില്ലാതെ ഒരു പഴയ വീടിന്റെ മുഖച്ഛായ മാറ്റാൻ ഇന്റീരിയർ ലൈറ്റിങ്ങിലൂടെ സാധിക്കും. പുതിയ വീടുകളിൽ കാണുന്ന ആ പ്രത്യേക 'ഗ്ലോ' പഴയ വീടുകളിലേക്ക് കൊണ്ടുവരാൻ സഹായിക്കുന്ന ചില ലളിതമായ വിദ്യകൾ പരിചയപ്പെടാം.

ഛായ മാറ്റാം  സീലിങ്ങിൽ നിന്ന്

പഴയ വീടുകളിലെ ഉയരം കൂടിയ സീലിങ്ങുകൾ ഫോൾസ് സീലിങ് നൽകാൻ ഏറ്റവും അനുയോജ്യമാണ്. വലിയ അലങ്കാരപ്പണികൾ ഒഴിവാക്കി ലളിതമായ പാറ്റേണുകളിൽ ജിപ്സം ബോർഡുകൾ നൽകി അതിൽ ലൈറ്റുകൾ ക്രമീകരിക്കുന്നത് മുറിയുടെ ആകെ ലുക്ക് മാറ്റും. വെളിച്ചത്തിന്റെ സ്രോതസ്സ് പുറമെ കാണാത്ത വിധം സജ്ജീകരിക്കുന്ന 'റിസസ്ഡ് ലൈറ്റിങ്'  രീതിയാണ് ഇപ്പോൾ തരംഗം. ഇത് മുറിയിലുടനീളം ഒരേപോലെ വെളിച്ചം പകരുകയും വീടിന് വലിയ വിസ്തൃതി തോന്നിക്കുകയും ചെയ്യും.

ട്രെൻഡിങ് ലൈറ്റുകൾ പരീക്ഷിക്കാം

മുമ്പ് വീടിന് അലങ്കാരമായിരുന്ന വലിയ ഹാങ്ങിങ് ലൈറ്റുകൾക്ക്  പകരം ഇന്ന് മിനിമലിസ്റ്റിക് ശൈലിയിലുള്ള ഹാങ്ങിങ് ലൈറ്റുകൾക്കാണ് ഡിമാൻഡ്. ഡൈനിങ് ടേബിളിന് മുകളിലോ സ്റ്റെയർകെയ്‌സ് ഭാഗത്തോ ഇത്തരം പെൻഡന്റ് ലൈറ്റുകൾ നൽകുന്നത് മുറിയുടെ മനോഹാരിത വർദ്ധിപ്പിക്കും. കൂടാതെ, ഭിത്തിയിലെ ചിത്രങ്ങളോ ആർട്ട് വർക്കുകളോ ഹൈലൈറ്റ് ചെയ്യാൻ ട്രാക്ക് ലൈറ്റുകൾ ഉപയോഗിക്കാം. വീടിന്റെ ഏതെങ്കിലും ഒരു മൂലയെ പ്രത്യേകമായി ഭംഗിയാക്കാൻ ഇത് സഹായിക്കും.

എൽ.ഇ.ഡി പ്രൊഫൈലുകളുടെ സൗന്ദര്യം

ഇന്ന് ഇന്റീരിയർ ഡിസൈനിംഗിലെ ഏറ്റവും വലിയ തരംഗമാണ് എൽ.ഇ.ഡി പ്രൊഫൈൽ ലൈറ്റുകൾ. ഭിത്തിയിലോ സീലിങ്ങിലോ നീളത്തിലോ വീതിയിലോ രൂപത്തിലോ ഇവ നൽകാം. സ്ലിം ഡിസൈനിലുള്ള ഈ ലൈറ്റുകൾ പഴയ വീടിന് ഒരു മോഡേൺ ഫീൽ നൽകാൻ ഏറ്റവും മികച്ച വഴിയാണ്.

വാം ലൈറ്റിന്റെ  പ്രൗഢി

ലൈറ്റുകളുടെ നിറം തിരഞ്ഞെടുക്കുന്നതാണ് ഏറ്റവും പ്രധാനപ്പെട്ട കാര്യം. വെള്ള നിറത്തിലുള്ള വെളിച്ചത്തേക്കാൾ ഇന്റീരിയറിൽ വാം വൈറ്റ്  ലൈറ്റുകൾ നൽകുന്നതാണ് കൂടുതൽ ഗുണകരം. ഇത് വീടിനുള്ളിൽ ഒരു ശാന്തമായ അന്തരീക്ഷം സൃഷ്ടിക്കുന്നതിനൊപ്പം ഫർണിച്ചറുകൾക്കും പെയിന്റിംഗിനും ഒരു ഗോൾഡൻ ടച്ച് നൽകുകയും ചെയ്യുന്നു.

ചുരുക്കത്തിൽ, ഒരു പഴയ വീട് വാങ്ങുമ്പോൾ അതിന്റെ പഴക്കത്തെയല്ല, മറിച്ച് ആ സ്ഥലത്തെ എങ്ങനെ വെളിച്ചം കൊണ്ട് പുനർനിർമ്മിക്കാം എന്നാണ് ചിന്തിക്കേണ്ടത്. ശരിയായ ലൈറ്റിങ് പ്ലാനിലൂടെ ഏത് പഴയ വീടിനെയും പുതുമയുടെ തിളക്കത്തിലേക്ക് മാറ്റിയെടുക്കാം.