പുതിയ വീട് വാങ്ങാൻ പോവുകയാണോ?പണം ചെലവഴിക്കുന്ന കാര്യമായതിനാൽ തന്നെ വീട് വാങ്ങിക്കുന്നതിന് മുമ്പ് നിങ്ങൾ ചില കാര്യങ്ങൾ ശ്രദ്ധിക്കേണ്ടതുണ്ട്. നിർബന്ധമായും ശ്രദ്ധിക്കേണ്ട അഞ്ച് കാര്യങ്ങൾ നോക്കാം.
സ്വന്തമായി ഒരു വീട് വാങ്ങുക എന്നത് ഒട്ടും എളുപ്പമുള്ള കാര്യമല്ല. ഏറെ പണം ആവശ്യമുള്ളതിനാൽ നന്നായി ആലോചിച്ച് മാത്രമേ വീട് വാങ്ങുന്നതുമായി ബന്ധപ്പെട്ട കാര്യത്തിൽ മിക്കവരും തീരുമാനം എടുക്കാറുള്ളൂ.
വലിയ തുക ആവശ്യമായതിനാൽ ലോൺ എടുത്താണ് ബഹുഭൂരിപക്ഷം പേരും വീട് വാങ്ങിക്കാറുള്ളത്. . നിങ്ങളുടെ സാമ്പത്തിക സ്ഥിതി, വീട് വാങ്ങിക്കാൻ പോകുന്ന സ്ഥലം, ലോൺ തിരിച്ചടവിനുള്ള വഴി എന്നീ മൂന്ന് കാര്യങ്ങൾ പുതിയൊരു വീട് വാങ്ങുമ്പോൾ തീർച്ചയായും ചിന്തിക്കണം.
1. സാമ്പത്തികവും ലോൺ തിരിച്ചടവിനുമുള്ള സാഹചര്യം
ഇന്നത്തെ കാലത്ത് പലർക്കും വീട് വാങ്ങുകയെന്ന സ്വപ്നം യാഥാർഥ്യമാക്കാൻ സാധിക്കുന്നത് ഹോം ലോണുകൾ ഉള്ളത് കൊണ്ട് മാത്രമാണ്. ഒരു വീടിന് ഉദാഹരണത്തിന് 100 രൂപയാണ് ചെലവ് വരുന്നതെന്ന് പ്രതീക്ഷിക്കുന്നതെങ്കിലും അധികച്ചെലവുകൾ സ്വാഭാവികമായും ഉണ്ടാവും. അതായത് 100 പ്രതീക്ഷിച്ചിടത്ത് 120ഉും 130മൊക്കെ ആവാം. ഭവന വായ്പ വഴി 75-90% വരെ ധനസഹായമാണ് ലഭിക്കുക. ബാക്കി തുക നിങ്ങൾ തന്നെ കണ്ടെത്തേണ്ടതുണ്ട്. കൂടുതൽ ഡൗൺ പേയ്‌മെന്റ് നടത്തിയാൽ നിങ്ങളുടെ ലോൺ തിരിച്ചടവ് അത്രയും കുറയ്ക്കാൻ സാധിക്കും. ഇതോടെ ഇഎംഐ തുകയിലും കുറവുണ്ടാവും. ഇങ്ങനൊക്കെയാണെങ്കിലും ലോൺ അല്ലാതെ നിങ്ങൾ പണം കണ്ടെത്തേണ്ടി വരും. അതിനെക്കുറിച്ചും ആലോചിക്കേണ്ടതുണ്ട്. ഡൗൺ പേയ്‌മെന്റ് ലാഭിക്കാൻ നിരവധി മാർഗങ്ങളുണ്ട്. ഉദാഹരണത്തിന്, നിങ്ങൾക്ക് നിക്ഷേപം പരിഗണിക്കാവുന്നതാണ്. ഒരു എസ്‌ഐ‌പി വഴി ഇക്വിറ്റി മ്യൂച്വൽ ഫണ്ടിൽ പ്രതിമാസം 25,000 രൂപ അടച്ചാൽ മൂന്ന് വർഷം കഴിയുമ്പോൾ 12 ശതമാനം പലിശയോടെ 10.9 ലക്ഷം രൂപ നിങ്ങൾക്ക് തിരികെ ലഭിക്കും.
നിങ്ങളുടെ ലോൺ തിരിച്ചടക്കാനുള്ള കഴിവ് എത്രയെന്ന് നിങ്ങൾക്ക് ലോൺ അനുവദിക്കുന്ന സ്ഥാപനം പരിശോധിക്കും.അതായത് നമ്മൾ ബാങ്കിന്ന് ലോൺ എടുക്കുമ്പോൾ തിരിച്ചടക്കാൻ നമുക്ക് പറ്റുമോ എന്ന് ബാങ്ക് നോക്കും.എങ്കിലും നിങ്ങൾക്ക് തന്നെ അതേക്കുറിച്ച് വ്യക്തമായ കാഴ്ചപ്പാട് ഉണ്ടാവണം. ഇഎംഐക്ക് പുറമെ നമുക്ക് ജീവിതച്ചെലവ് ഒരുപാട് ഉണ്ടാവും. അത് എന്തെല്ലാമെന്ന് വിലയിരുത്തി വ്യക്തമായ പദ്ധതി തയ്യാറാക്കണം.
2. ക്രെഡിറ്റ് സ്കോർ
പുതിയ വീടിന് വേണ്ടി ലോൺ എടുക്കാൻ പോവുകയാണെങ്കിൽ മികച്ച ക്രെഡിറ്റ് സ്കോർ ഉണ്ടെന്ന് ഉറപ്പ് വരുത്തണം. 750 അല്ലെങ്കിൽ അതിന് മുകളിലുള്ള ക്രെഡിറ്റ് സ്കോറാണ് നല്ലത്. ക്രെഡിറ്റ് സ്കോർ കൂടുതൽ ഉള്ളത് നിങ്ങളുടെ തിരിച്ചടവ് ശേഷി ശക്തമാണെന്ന് സൂചിപ്പിക്കുന്നു. അങ്ങനെയാവുമ്പോൾ കുറഞ്ഞ പലിശനിരക്കിൽ ലോൺ ലഭിക്കാനുള്ള സാധ്യതയുമുണ്ട്. നിലവിൽ നിങ്ങൾക്ക് എന്തെങ്കിലും ഹ്രസ്വകാല ഇഎംഐ ഉണ്ടെങ്കിൽ അത് എത്രയും പെട്ടെന്ന് അടച്ച് തീർക്കുക. കൂടുതൽ ഇഎംഐ ഉണ്ടെങ്കിൽ ലോൺ തിരിച്ചടവ് നിങ്ങളെ പ്രയാസത്തിലാക്കും. ഇത് ക്രെഡിറ്റ് സ്കോറിനെയും ബാധിക്കും.
3. ആവശ്യമായ രേഖകളും സർട്ടിഫിക്കറ്റുകളും ഉണ്ടെന്ന് ഉറപ്പാക്കലാണ്‌
വീട് വാങ്ങുന്നവർ ആദ്യം തങ്ങൾ വാങ്ങുന്ന വസ്തുവിന് ആവശ്യമായ സർട്ടിഫിക്കറ്റുകളും നിയമപരമായ രേഖകളും ലോക്കൽ ക്ലിയറൻസുകളും ഉണ്ടോ എന്ന് സൂക്ഷ്മപരിശോധന നടത്തണം. റിയൽ എസ്റ്റേറ്റ് റെഗുലേറ്ററി അതോറിറ്റിയിൽ (RERA) വസ്തു രജിസ്റ്റർ ചെയ്തിട്ടുണ്ടോ എന്നതാണ് പ്രധാനമായി പരിശോധിക്കേണ്ട മറ്റൊരു കാര്യം. നിങ്ങളുടെ വീടിൻെറ പ്രൊജക്ട് വൈകുകയോ അല്ലെങ്കിൽ നിർമ്മാണത്തിൽ എന്തെങ്കിലും കുഴപ്പങ്ങളോ ഉണ്ടെങ്കിൽ RERAയിൽ രജിസ്റ്റർ ചെയ്തിട്ടുണ്ടെങ്കിൽ നിങ്ങൾ പരാതി പെടാനും അതുവഴി സംരക്ഷണം ലഭിക്കനും കഴിയു.ആവശ്യമായ സർട്ടിഫിക്കറ്റുകളും ക്ലിയറൻസുകളും ഇല്ലെങ്കിൽ നിങ്ങളുടെ വസ്തുവിന് ധനസഹായം നൽകാൻ ബാങ്കുകളും മറ്റും തയ്യാറായേക്കില്ല.
4. കൈവശാവകാശവും ബാധ്യതസർട്ടിഫിക്കറ്റും
വസ്തുവിൻെറ കൈവശാവകാശ രേഖയും (Title Deed), ബാധ്യത സർട്ടിഫിക്കറ്റും (Encumbrance Certificate) വീട് വാങ്ങുന്നതിന് മുമ്പ് തന്നെ പരിശോധിച്ച് ബോധ്യപ്പെട്ടിരിക്കണം. ഭൂമിയുടെ ഉടമസ്ഥാവകാശ രേഖയാണിത്. വസ്തു കൈമാറ്റം ചെയ്യുന്നതിനോ ഉടമസ്ഥാവകാശം വിൽക്കുന്നതിനോ ഉള്ള അവകാശം ആർക്കാണെന്ന് ബാധ്യത സർട്ടിഫിക്കറ്റിലൂടെ മനസ്സിലാകും. ഏതെങ്കിലും വ്യവഹാരത്തിൽ പ്രോപ്പർട്ടി കുടുങ്ങിയിട്ടുണ്ടോ ഇല്ലയോ എന്നിവയെക്കുറിച്ച് നിങ്ങൾക്ക് നല്ല ധാരണ ഉണ്ടാവുന്നതിനാണ് കൈവശാവകാശ രേഖ പരിശോധിക്കേണ്ടത്. വസ്തുവിനു നിയമപരമായ പ്രശ്നങ്ങൾ ഇല്ലെന്നതിന്റെ തെളിവാനിവ.രേഖകൾ പരിശോധിക്കാൻ നിങ്ങൾക്ക് ഒരു അഭിഭാഷകന്റെ സഹായവും തേടാവുന്നതാണ്. ഭാവിയിൽ പ്രശ്നങ്ങൾ സൃഷ്ടിക്കുന്ന ഒരു വസ്തുവിൽ നിക്ഷേപിക്കാൻ ആർക്കും താൽപര്യമുണ്ടാവില്ല.
5.സ്റ്റാമ്പ് ഡ്യൂട്ടിയും മറ്റ് ചാർജ്ജുകളും
നിങ്ങളോട് പറഞ്ഞിരിക്കുന്ന തുകയിൽ നിന്ന് വ്യത്യസ്തമായിരിക്കും നിങ്ങൾ വസ്തു വാങ്ങുമ്പോൾ ചെലവാക്കേണ്ടി വരുന്നത്. പുതിയ വസ്തു വാങ്ങുമ്പോൾ മറ്റ് പല ചാർജുകളും നൽകേണ്ടി വരും. സ്റ്റാമ്പ് ഡ്യൂട്ടി (5-7%), രജിസ്ട്രേഷൻ ഫീസ് 1-2%, മെയിന്റനൻസ് ചാർജുകൾ, പാർക്കിംഗ് ചാർജുകൾ എന്നിവയെല്ലാം കരാർ ഒപ്പിടുമ്പോൾ നൽകേണ്ടതായി വരും. ഇത് കൂടാതെ 45 ലക്ഷത്തിൽ കുറവ് ചെലവ് വരുന്ന വീടുകൾക്ക് 1 ശതമാനവും 45 ലക്ഷത്തിന് മുകളിൽ വരുന്ന വീടുകൾക്ക് 5 ശതമാനവും ജിഎസ്ടി അടക്കേണ്ടതായിട്ടുണ്ട്. ഇത്തരം ചെലവുകൾ എന്തെല്ലാമെന്ന് വ്യക്തമായി അറിഞ്ഞിരിക്കണം.
ആദ്യം പറഞ്ഞിരിക്കുന്ന അഞ്ച് പ്രധാന കാര്യങ്ങൾക്ക് പുറമെ ഒരു പുതിയ വീട് വാങ്ങിക്കും മുമ്പ് ചില വസ്തുതകൾ കൂടി അറിഞ്ഞിരിക്കണം. വസ്തു നിൽക്കുന്ന സ്ഥലം നന്നായി വിലയിരുത്തുക. വിദ്യാഭ്യാസ സ്ഥാപനങ്ങൾ, ആശുപത്രികൾ, റെയിൽ-റോഡ് കണക്റ്റിവിറ്റി, വിമാനത്താവളങ്ങൾ, ഷോപ്പിംഗ് മാർക്കറ്റുകൾ എന്നിവയെല്ലാം അടുത്തുണ്ടോയന്ന് നോക്കണം. ഇത്തരം സൗകര്യം നിങ്ങളുടെ ജീവിതനിലവാരം ഉയ‍ർത്തുമെന്നുറപ്പാണ്. ഒരു വീട് വാങ്ങിക്കുകയെന്നത് ജീവിതത്തിൽ എപ്പോഴും സംഭവിക്കുന്ന കാര്യമല്ല. അത് വളരെ അപൂ‍ർവമായി മാത്രമേ ഉണ്ടാവുകയുള്ളൂ. അതിനാൽ ജാഗ്രതയോടെ മാതം മുന്നോട്ട് പോവുക. ആവശ്യത്തിന് ഗവേഷണം നടത്തി വിശ്വസിക്കാവുന്ന ആളുകളിൽ നിന്ന് ഉപദേശങ്ങൾ സ്വീകരിച്ച് തീരുമാനത്തിലെത്തുക. സാമ്പത്തിക ആസൂത്രണം വളരെ പ്രധാനമാണെന്നതും ഓ‍ർക്കുക. ഇത്രയും കാര്യങ്ങൾ ശ്രദ്ധിച്ചാൽ നിങ്ങൾക്ക് സന്തോഷത്തോടെയും സംതൃപ്തിയോടെയും ഒരു വീട് വാങ്ങാവുന്നതാണ്.
