ഫ്ലാറ്റ് 1 BHK വേണോ 2 BHK വേണോ; നഗരങ്ങളിൽ തരംഗമാകുന്ന 1 BHK ഫ്ലാറ്റുകൾ വാങ്ങുന്നതിനു മുന്നേ അറിഞ്ഞുവയ്ക്കണം ഈ ഗുണങ്ങളും ദോഷങ്ങളും

നഗരവൽക്കരണം ശക്തമാവുകയും സ്ഥലവില കുതിച്ചുയരുകയും ചെയ്യുമ്പോൾ, 'സ്വന്തമായ ഒരിടം' എന്ന സ്വപ്നവുമായി പലരും 1 BHK ഫ്ലാറ്റുകളിലേക്ക് വഴിമാറുകയാണ് ഇന്ന്. മുംബൈ പോലുള്ള മഹാനഗരങ്ങളിൽ സാധാരണ കാഴ്ചയായിരുന്ന ഈ ചെറിയ ഫ്ലാറ്റ് യൂണിറ്റുകൾ, ഇന്ന് കേരളത്തിലെ നഗരങ്ങളിലും പ്രിയങ്കരമായി മാറിക്കൊണ്ടിരിക്കുകയാണ്. ചെലവു കുറഞ്ഞതും പരിപാലനം എളുപ്പമുള്ളതുമായ ഈ ഫ്ലാറ്റുകൾക്ക് ആവശ്യക്കാർ ഏറുന്നതിന്റെ കാരണങ്ങളെന്തൊക്കെയാണ്? ഈ ആകർഷകമായ തിരഞ്ഞെടുപ്പിന്റെ ഇരുവശങ്ങളും നമുക്കൊന്ന് പരിശോധിക്കാം.

റിയൽ എസ്റ്റേറ്റ് വിപണിയിൽ 1BHK ഫ്ലാറ്റുകൾക്ക് ഡിമാൻഡ് വർധിക്കാനുള്ള പ്രധാന കാരണങ്ങൾ എന്തൊക്കെയെന്ന് നോക്കാം.

കുറഞ്ഞ നിർമ്മാണച്ചെലവും വിസ്തൃതിയും കാരണം, ബജറ്റ് പരിമിതികളുള്ളവർക്കും ആദ്യമായി വീട് വാങ്ങുന്നവർക്കും 1BHK ഫ്ലാറ്റുകൾ താങ്ങാനാവുന്ന വിലയിൽ ലഭിക്കും.

ഐടി പാർക്കുകൾ, കോളേജ് കാമ്പസുകൾ, നഗര കേന്ദ്രങ്ങൾ എന്നിവിടങ്ങളിൽ ജോലിക്കും പഠനത്തിനുമായി തങ്ങുന്നവർക്ക് 1BHK ഫ്ലാറ്റുകൾക്ക് വലിയ ഡിമാൻഡാണ്. വാടകയ്ക്ക് നൽകാൻ ഫ്ലാറ്റ് വാങ്ങുന്നവർക്ക് ഇത് മികച്ചൊരു നിക്ഷേപ സാധ്യതയാണ്.

കുറഞ്ഞ സ്ഥലമുള്ളതിനാൽ അനാവശ്യമായ സാധനങ്ങൾ കൂട്ടിയിടുന്നത് ഒഴിവാക്കി ലളിതമായ, 'മിനിമലിസ്റ്റ്' ജീവിതശൈലി പിന്തുടരാൻ ഇത് പ്രചോദനമാകും.